Hier is nou die plek waar ons regtig kan gesels. Die opskrif van die blaai het 'n sensor merkie in. Dit is nou om die kinders te beskerm. Is dit nodig? My persoonlike mening is dat Afrikaans-sprekende kinders die ou woordjie ken so van omtrent die tyd dat hulle kan praat.
Laat my dink aan die ou storietjie van die kleuters wat hulle ouderdom uitgewerk het.
Kosie: "Hoe oud is jy?
Jannie: "Weetie"
Kosie: "Tlek jy dlaat?"
Jannie: "Was dit?"
Kosie: "Jys twee."
En nou is ons midde in die argument oor wat is vloek en wat is nie. Nou wil ek nie ingewikkeld raak nie, ons hou dit maar op die vlak van ouens wat "so effens gekletter is maar nie poep dronk" is nie.
Nou moet ek maar my posisie stel, en omdat ek die baas, eienaar en alleen arbiter is oor wat hier verskyn, is dit die finale woord. Al wat vloek is, is om die Skepper se naam ydelik te gebruik. Ander woorde, uitdrukkings, en segswyses mag tot 'n meerdere of mindere mate as vulgêr beskou word, afhangende van wie oordeel.
Laat my dink aan die volgende storie, wat my vir die heilige waarheid vertel is.
In die Nuwe Suid-Afrika word dit in sommige kringe as vulgêr beskou om Afrikaans te praat. Die ABM (Afrikaanssprekende Blanke Man) reis af Kaap toe met SAL, sorry, SAA. Hy het vroeg ingeweeg en 'n venster sitplek gekry. So net voor die deure sluit, wens hy homself geluk dat hy gemaklik gaan reis, die middel sitplek is nog leeg. En daar kom die OSV (Onbepaaldsprekende Swart Vrou) aangestoom en neem langs hom plaas.
"Goeie middag", groet hy beleef.
Sy kyk hom uit die hoogte aan, "Sorry, I don't understand"
"Good Afternoon", herhaal hy, in die "ander" taal.
Al antwoord wat hy kry is 'n spierwit glimlag en 'n knikkende kop.
Na die spanning van die opstyg verby is en die drankies uitgedeel is, gesels hy en sy reisgenoot. Waar kom hulle vandaan, die kinders, ens., alles op Ingels.
Skielik slaat die vliegtuig 'n afwaartse lugstroom en die volgende oomblik die opwaartse maatjie.
Die OSV gryp die ABM aan die arm beet en verraai haarself as 'n ASV met die woorde:
"God baas ons val!!!
En daar doen ek dit, wat ek gesê het vloek is. Maar as ek aanhaal wat iemand anders gesê het, is dit vloek? Ag, vergeet dit, te ingewikkeld vir my, sê wat jy effen wil. As iemand eksepsie vat sal hy jou wel donner.
Hier is nou jou kans om jou antwoord te gee. Vul die ou vormpie in as jy iets te sê het. As jy nie nou praat nie, hou jou bek vir ewig!